was successfully added to your cart.
A tanglei mang kong hi Psychologist minthang Ian Wallace nih mang 150,000 kha kum 30 chung hneksaknak a tuah hnu ah a langhtermi a si.

1. Mi pakhatkhat nih dawi:

Kan zaanmang ah kan ral nih kan hnulei in a kan dawi caan a um. Cu bantuk mang kan manh a si ahcun a tak nunnak ah thil pakhatkhat kongah lungawttawm in kan umnak sining kha a langhter. Thil pakhat tuah kan duh, asinain, kan ngamh pah tthan lo.
Cu bantuk thil sining nih atak nun ah a kan tlak tikah biachahnak fek tein tuah i ral ttha tein kan i thimmi lam kha pah ding a si. Kan i thimmi lamcung ah lungtthawng in kar kan hlan tikah kan minung thilti khawhnak kha a hun chuak ve tawn i teinak lam leiah a kan panhpi.

2. Haatlongh:

Zaanmang ah a haa a tlongmi hi an tam ngai. Laimi tampi ruahnak ah thihttian ttiannak tibantuk sullam a ngei, tiah ruah a si i ihzaanmang haatlongh cang ahcun thinphang in kan um. Asinain, Wallace tu nih cun phundang in a hrilhfiah: Mang ah kan haa a tlongh a si ahcun kanmah le kanmah kan i zumhnak (confidence) kha a tak nunnak ah a zorchuk tinak a si. Mah le mah i zumhnak kan thlau i santlai lo/thil ti kho lo ah kanmah tein kan i hmu.
Hi caan ah hin lung hun i fimh thliahmah i, zei bantuk harnak pawl dah ka nunnak nih a ton timi pawl pakhat hnu pakhat in tuaktaan, cun, cu harnak pawl cu zaangdernak caah si loin zuamcawhtu (challenge) phun khat ah cohlan i “hehchat” tiah hmainor ve ding khi a si.

3. Mi Hmaika ah Taklawng Fangfaro in Um:

Na mang chungah mizapi hmaika ah taklawng fangfaro in na um ahcun atak nunnnak thil pakhatkhat na tuahmi/na tonmi/na sining ruangah pumpak humhimnak na ngei lo tinak a si. Humhimnak ti tikah ral lei si loin, ningzah thlanghlamhnak lei deuh hi a sawh. Khatlei khel cun thuhnawhmi konglam/sining te zong na rak ngei ziar ko lai.
Khi caan ah a biapi ngaingaimi cu mah caah tthatnak a si ko ahcun pianghlang tein hawi sinah chimphuan, i ruah tti le ruahnak hal tibantuk kha a biapi ngaingai.

4. Caminpuai Na Phi Kho Lo:

Kan mang ah caminpuai kan phit khawh lo ahcun a tak kan nunnak ah kanmah le kanmah sining kha kan i chek cuahmah tinak a si. Minung hi caan khatkhat ah cun ‘zeidah ka lawh, zeidah ka si, mittha miding ka si maw, mi nih remmi teh ka si maw, ka thil tuahmi hna hi an dik maw, tbk.,’ biahalnak phunphun kanmah le kanmah kan i hal caan a um–cucu kanmah le kanmah kan hun i cheknak a si.
Cu bantuk in mah le mah hun i chek hi thil ttha ngaingai cu a si ko. Asinain, mah le mah sining cuai hun i thlai zungzal hi a ttha thlu hlei lo. Kan thilti khawhnak le teinak kan hmuh cung tu ah khan diriamhnak hun ngeih ve i, kanmahle pahrang kha sang chin tthawng chin in hman khawh i zuam tu hi a rak biapi deuh ve. Mah le mah cuai i thlai zungzalna nih lungdonghnak a chuahpi khawh i kan i zumhnak (confidence) zong kha a zorter khawh.

5. Zuan:

Kan mang ah vanva bangin kan zuang tawn. Hi mang kan manh a si ahcun a tak nunnak ah kan tonmi lungretheihnak tompi maw/harnak lianpi/rian nganpi maw tibantuk pawl in kan i phoih kho tinak a si, tiah Wallace nih a chim.
Kan i phoih kho ti tikah vantthat/vanchiat ruangah si loin mah nih i zuamnak asiloah aharmi biachahnak pawl tuahnak thawngin i phoih khawh khi a langhter duhmi a si.

6. Tlak:

Zaanmang ah hor ah maw, innsang in maw, thingkung cungin maw tibantukin kan tla tawn. Hi mang kan mah a si ahcun, atak kan nunnak ah thil/konglam pakhatkhat kan i sehchih/hruhpi tinak a si.
Thil pakhatkhat kan i sehchih tuk tikah lungretheihnak a chuak tawn/micheu an hruh beh tawn. Cu bantuk thil kan ton a si ahcun lungdai tein hun i dindorh hniahmah i mah le mah zumhnak fek he punghmaan tein karhlan kha thil ttha a chuahpitu a si deuh.

7. Zunput Kawl:

Mang ah pawngkal duh i zunput hmuh lo zong hi a um tawn. Hi mang nih a langhtermi cu na nunnak nih a herh taktakmi na chambau tinak a si. Sihmanhsehlaw, nangmah lila zong nih cu na herhmi te cu zeidah a si, tiah na fiang tein na hliah kho ve lo.
Cucaah, hi mang na manh cang ah hin cun midang herhbau kong va tuaktaanpiak len kha ngol chung rih phot law, nangmah herhbaumi tu kha biatak tein tuaktaan le kawlhawl i zuam ko cang.